Ngu Citabilizyo Mweembe
Hwange FC (CHipangano FC) munyaka wakiinda yakasobana zinywisya maanzi kusika yelelwa kusobana atubunga tupati mulizya bhola lyamumpiila tulimbuli Manica Diamonds, ZPC Kariba, Chicken Inn, Dynamos antoomwe a Highlanders FC.
Chipangano FC munyaka wakiinda yakanyampula ndembela yabantu bamu Hwange alimwi munyaka ooyu chaangwa muyuni, ilabweda musule loko kuli zyamusobaano wa bhola lyamumpiila. Nviki yamana mumugibelo 23 Vumbipati 2024 Hwange FC yakaswenene a Bikita Minerals yasikulyigwa tubili. Bakeezya anzila zyoonse bana balumi kuzyazyambala kuti antela balakonzya kusyaala mutubunga tulajulu pesi zyakakachila.
“Munyaka utobela Chipangano FC inosobana atubunga tunini mulizya bhola lyamumpiila nkaambo kakuzundwa munyaka ooyu. Teensi nzitwakali kulangilila pe eezi ku Chipangano FC munyaka ooyu, twakalangililide kuya kunembo pesi zyakakachila,” bakambuula ba Joseph Nyoni kabatondezya kutyompwa.
Munyaka utobela Hwange iyede kubeleka achanguzu kuti ilwanine kubweda lubo achiimo mpiyakabede munyaka wakiinda. Bede kula bambi basobani kulitumwi tubunga kuchitila kuti bakonzye kuzunda kumusobano wabo mwaaka utobela.
“Ansinga zyali kukonzeka bapati kabayanduula bambi basobani mukabunga aaka amwi kalikunyampuka lubo. Kabawula banywinsya bhola kunembo aba jala musule yalikusima Hwange FC,” wakayungizya Elton Phiri kalangika kuti ulabulangilizi bubotu kuzwa kukabunga kabo.
Nikuba kuti Chipangano FC yabweda kumuchila lubo pesi bantu banoyebela ZPC Hwange. ZPC Hwange yajala mweenya wali wachitwa a Chipangano FC. Bantu bamu Hwange bali batondeezya kusyalila kumusobano wa bhola lyamumpiila kwinda mukulyigwa kwakachitwa akabunga kabo pesi kwanyampuka kambi kabunga katabayiminine munyaka utobela.
“Tulazumina kuti twakazundwa munyaka ooyu pesi kulilimwi bbazu twabuka lubo nkaambo ZPC Hwange FC inoli kilokusobana atubunga tulajulu mbuli kwalikusobana Chipangano mazuba ayinda muliyeyo njibati muchikuwa ni Castle Lagar Premier Soccer League,” wakambwida ajulu Philani Dube kala lumwemwe lwakuti Chipangano yababambi bayiminini mulizya bhola lyamumpiila.
Munyaka woonse utobela Chipangano FC inoli achiindi chakubambila akulangulisya kuti niiyi loko penzi lyakabachita kuti bazundwe kumusobaano wabo. Eezi zipa kuti babeleke achamanguzu munyaka uuza pesi balyiiba kunoli kwaba nkukudyondyomena kwakabunga ka bhola lyamumpiila mubusena bwa Hwange.
New Ziana
