Kulinga mazina kwazhulwa

Banobona nozweshalujo munyika, be Zimbabwe Electoral Commission (ZEC) bakumukutayija banhu
kuti bende kunolinga mazina abo kuti ayimo na mumakwalo,nopokuvotela akale nokubona kuti
mazina abo alokwalwa zwibuyanana na. Kulingwa kwamazina kunotanga noMugibelo yoyu umuzha
inyika ibambanyila mavoti achabelipo golelino muna Gotonga (August).
Mumawi okusungwaja banhu, be ZEC bakati kulingwa kwamazina kumutanga noMugibelo kunopela
nobwatatu iviki linozha. She nkulwana unobona nozokushaluja batungamili munyika ba Utoile
Silaigwana bakati mazina,nenamba jechitupa zunokwelela kulingwa kuti ndizo na akale zwakakwalwa
zubhodo na, kana pelinozwakalunduka zunokwelela kukololwa. 
BaSilaigwana bakati: “ZEC ichazhula mabhuku amazina abanhu achashingiswa mukuvota yelino Gole
lya 2023 kutila kuti banhu belinge mazina abo. Bugalo buchabe shingiswa mukulinga mazina
buchabezhulwa na 7 kuseni kuvalwa na 5 madeko kuva pa 27 Kwanula kunoswika pa 31 Kwanula,
2023.” Bakendila mbeli beti kuti bemubhanche mukulinga izina, unhu wose ende ekanyamula
chitupa kana kuti ipasipoti inoshinga. 
Bose yabo bakakwalisa kuvota pa 28 Homba (April) kana kuti asanu aswika, mazina abo ayimo
mumabhuku amazina abanhu bachavota mushalujo.Nokudalo, banhu bamukutaijwa kuti benolinga
mazina abo kubugalo bwabo kwakatalwa kuti ndikokwaba chenda kunolinga mazina abo. Ba
Silaigwana bakendila mbeli beti banhu banokwanisa bo kulinga paluwayile beshingisa inamba inoti
*265# pe Econet kana kuti pe Netone.
Mulawu unokwendeleja zokuvota (Electoral Act) Chikamu 2:13 pana 21(1) unoti banhu bose
bakakwalisa kuvota banokwelela kunolinga mazina abo kuti ayimo na mumakwalo okuvota akale
izina, inamba jechitupa nopokuvotela zwilokwalwa zubhodo na. Kuna bamwe be ZEC bachabenda
belayija nokukutayija banhu mubugalo kuti bende kunolinga mazina abo kwabachavotela unshaji
wamavoti ungoswika muna Gotonga.

STORIES FROM COMMUNITY PODIUM