OwaseGweru owabulala abantu wabaleka usezathonisiswa

Usomabhizimusi waseGweru owabaleka kuleli njalo ocatshangelwa ukuthi wabulala abantu,
uPeter Dube, ukhangelelwe ukuphendukiswa elizweni ukuze azetshutshiswa njengoba
kukhanya ingqubo yokuphendukiswa kwakhe isizaphumelela.
Isikhulumeli samapholisa akuleli aweZimbabwe Republic Police uAssistant Commissioner
Paul Nyathi uthe ingqubo yokuphendukisa usomabhizimusi wezimota lo, oleminyaka
yokuzalwa engamatshumi amathathu lasikhombisa (37), owabotshwa eRed Cow Refugee
Centre kwele-Ireland, ukuze azethonisiswa iyaqhubeka.
Isikhulumeli samapholisa sithe, “Siyaqinisekisa ukuthi ingqubo yokuphendukisa uPeter Dube
ocatshangelwa ukuthi wabulala abantu isisezingeni eliphezulu.
“UPeter Dube ubedingwa ngenxa yezindaba ezimbili zokubulawa kwabantu lezimbili
zokuphosa abulale abantu ezenzakala eGweru ngo-2021. Sisebenzelana ndawonye logatsha
lwabatshutshisi olweNational Prosecuting Authority kanye labanye abaphatheka kuzindaba
ezinje ukuze aphendukiswe elizweni ezothonisiswa.”
UDube owabotshwa kwele-Ireland kuviki edluleyo, wabaleka elizweni ngo-2021 ngemva
kokudubula abantu ababili bafa andubana alimaze abanye ababili eGweru ngemva
kokwethesa unkosikazi wakhe wesibili icala lokungathembakali emtshadweni.
UDube obedingwa yi-Interpol wabalekela eDublin esebenzisa ibizo lamanga. Kubikwa
amapholisa e-Ireland asebenzisa i-Interpol ukucela eminye imininingwane evela
kumapholisa akweleZimbabwe, aseyiphiwa.
Usomabhizimusi wezimota lo ubikwa wadubula unkosikazi wakhe wesibili uNyasha Nharingo
kanye lalowo owayecatshangelwa ukuthi uthandana laye uShelton Chiduku eGweru
ngoMabasa ka-2021. Umngane kaNyasha uGamuchirai Mudungwe laye wadutshulwa wafa
kulesi isehlakalo.
Udaba lolu lwamangalelwa ngaphansi kwenombolo ethi RRB4655417. UDube wantshintsha
ibizo lakhe laba nguXolile Mtsali, ngemva kwalokho wathola ipasipoti (A09465267) Eswatini
mhlaka 28 Mfumfu ngo-2021, sekudlule inyanga ezinhlanu ngemva kokudubula abantu.
Ipasipoti leyo yiyo ayisebenzisa ukuya e-Ireland lapho afika enza isicelo sokuhlala
njengesiphepheli.
UDube ubikwa wafika waba yingxenye yeqembu labantu elilungisa incwadi zamanga
kweleSouth Africa lakweleSwatini. Omunye okhulume lephephandaba leli kodwa engafuni
ukuthi avezwe ibizo uthe ngempela kuliqiniso ukuthi uDube ubengomunye weziphepheli
ebezihlala eRed Cow Moraan Hotel eDublin.
Ngosuku lapho okwenzakala lesi isehlakalo, mhlaka 23 Mabasa 2021, uDube walanda
unkosikazi wakhe wesibili, uNyasha Nharingo, kanye londoda okucatshangelwa ukuthi
wayethandana laye, uChiduku laye ongusomabhizimusi othengisa izimota owayehlezi
NDEBELE

ebhasini encane eyeyipakwe phandle efuletini elisenkabeni yedolobho leGweru lapho
okwakuhlala khona unkosikazi wesibili.
Wafika wadubula, wabulala uChiduku eseduzane wasephinda wadubula umgane kankosikazi
wakhe uMudungwe esifubeni. UMudungwe wahle wafa khonapho.
Waqhubekela phambili wadubula uNyasha lodadewabo uNyaradzo. Laba bobabili
bagijinyiselwa esibhedlela lapho uNyaradzo afika wafela khona.
Kukholelwa ukuthi uDube loNyasha babelesikhathi eside bengazwanani. UDube wayekholwa
ukuthi uNyasha uyamqila emtshadweni. Ngemva kokudala icala, uDube wanyamalala njalo
ubecatshangelwa ukuthi wachapha umngcele waya kweleSouth Africa.

Indaba le ihumutshelwe elimini lwesiNdebele yiMidlands State University National Language
Institute.