MUTARE-Vanhu makumi maviri nevaviri vanga vari mubhazi reTrip Trans raienda kwaMutare svondo
rapfuura vakabirwa mari nezvinhu zvinokosha zvinosvika zviuru nezviuru zvemadhora nevarume vatatu
vaiva nepfuti, chinhambwe chemakiromita makumi maviri pamberi paMutare.
Chiitiko ichi chakaitika nguva pfupi yadarika patollgate mumugwagwa mukuru weMutare-Bocha.
Mutauriri wemapurisa kudunhu reManicaland, Inspector Nobert Muzondo, vanotsinhira nyaya yekuti
bhazi raibva kwaMuchena Business Centre riine vanhu makumi maviri nevaviri rakabirwa.
“Makororo matatu aya akakwira bhazi paBambazonke bus stop akananga kwaMutare. Mumwe
wevatatu ava akazokumbira kuzorora pa22 miles bustop achiti ainetseka nedumbu. Akaburuka mubhazi
kwechinguva chidiki ndokudzoka okwira. Achangogara kune waaive naye, akabva aburitsa pfuti
ndokuridza pfuti pahwindo rewindscreen achiti munhu wese arare pasi achisiya zvinhu zvake
zvinokosha,” vanodaro Insp Muzondo.
Mushure mekuunganidza zvinhu zvakakosha, imwe pfuti yakapfurwa kuseri kwebhazi vanhu vatatu ava
vasati vangoburuka ndokutiza.
Makororo aya akawana mari inosvika US$943 uye nharembozha gumi dzinoita US$635.
Mapurisa akapinda panzvimbo iyi akawana 9mm live round uye 9mm yakashandiswa cartridge mubhazi.
Inspector Muzondo vanoti nyaya iyi ichiri kuferefetwa pachitsvagwa makororo matatu aya.
Comments are closed.