LOADING

Type to search

Chaminuka Provincial Newspapers

Vanhu vanodarika mazana mapfumbamwe vakasungirwa kutora zvinodhaka

Share

MARONDERA- Dunhu reMashonaland East rave kusimbaradza danho rehondo
yekurwisana nekutorwa kana kutengeswa kwezvinodhaka iro riri kutsviriridza
munzvimbo dzakasiyanasiyana siyana munyika.

Izvi zviri kuitika panguva iyo vanhu vanosvika kumazana mapfumbamwe nemakumi
mashanu ane matanhatu vakasungirwa zvinodhaka zvisiri pamutemo pamwewo
nedzimwe mhosva dzinosanganisira kutengeswa zvinodhaka kana kupara mhosva
dzinokonzerwa kana munhu achinge anwa, kuputa kana kufemba zvinodhaka.

Svondo rakapera, pakaitwa chenjedzo dzinoyambira kuti vanhu, zvikuru sei vechidiki, vasiyane
nezvinodhaka sezvo zvichivakanganisa hutano uyo kuvakwezvera mukupara mhosva.

Pachirongwa chechenjedzo ichi, vanhu vanosanganisira vemapazi ehurumende akasiyana siyana,
vechidiki pamwe nevemasangano akazvimiririra vakafamba kubva pakati pedhorobha reMarondera
vakananga kunhandare yeRudhaka uko kwakaturwa mashoko eyambiro pamwe nekuitwa mitambo ine
dingindira rekushoropodza kutorwa kwezvinodhaka.

Gurukota rinoona nezvekusimudzirwa pamwe nekufambiswa kwemabasa mudunhu reMashonaland
East, Dr Aplonia Munzverengwi avo vainge vakamirirwa namudzviti weMarondera
Clemence Masawi vakati zvakakosha kuti mapazi ose eHurumende pamwe
neakazvimirira arambe achishandidzana mukurwisana nedambudziko rekutorwa
kwezvinodhaka iro riri kukonzeresa matambudziko munharaunda.

Vakati: "Nhengo dzekomiti yedu yakaumbwa kuti ipote ichipa mazano pamwe nekutungamira
muzvirongwa zvekurwisana nenyaya yekutorwa kwezvinodhaka dziri kugara dzichiita misangano yadzo.
Misangano iyi inonzvera ziviso dzinosanganisira kutengeswa kunoitwa zvinodhaka, kushata kwazvakaita,
kubatsirwa kwevakavhiringika mushure mekutora zvinodhaka uye matanho angatorwe kuti tipedze
hosha yekutorwa kwezvinodhaka iyi.

"Mapurisa edu anogara achiferefeta mhosva dzine chekuita nenhau yekutorwa kwezvinodhaka
kunyanya kuHwedza, Murehwa, Chikomba pamwe Marondera uko nyaya idzi
dzakanyanya kutekekeshera. Kushanda kwavo kwakaita kuti vasunge uye kuendesa
kumatare edzimhosva vanhu vanosvika kumazana mapfumbamwe ane makumi
mashanu ane matanhatu pakati pemwedzi yaGunyana naGumiguru.
"Gore rakapera mukati menguva imwecheteyo, pakaparwa mhosva dzinosvika
kumazana mashanu ane makumi maviri nematatu. Izvi zvinoratidza kuti mhosva dzine
chekuita nekutorwa kwezvinodhaka dziri kuramba dzichiwanda uye panoda chenjedzo
yakasimba kuti tikunde muhondo iyi."

KwaMurehwa kunova imwe yenzvimbo dzanetsa panyaya yekutorwa kwezvinodhaka,
mapurisa akaita chirongwa chavaiti Operation Clean-Up Murehwa icho chakabatsira
kuti vapekeshe ndokuwana zvinodhaka zvisiri pamutemo zvinosanganisira crystal meth,
dagga, broncleer, benylyn, histalix, cordain, musombodhiya netegu-tegu, pakati
pezvimwe zvakatsaukana.
“Pamusoro pezvakaitwa kwaMurehwa izvi, ndaudzwa kuti tine dambudziko guru
muMarondera umo tine nzvimbo dzakaita seDombotombo uko kwanetsa nenyaya
yekutengeswa uye kuputwa kwezvinodhaka. Ndinoda kupa kurudziro kumapurisa edu
nemamwe mapazi anobataira mukuchengetedza nyika kuti vabate vari kutengesa
zvinodhaka vose vopihwa mitongo inoita kuti vose vane mifungo yekuda kutengesa
kana vari kutengesa zvinodhaka vapfire pasi tsika iyi.
"Vose vari munhau dzine chekuita nekutorwa kwezvinodhaka vanofanirwa kudomwa
vofumurwa pajekere,” Dr Munzverengwi vakadaro.
Vaimbove Mayor wedhorobha reMarondera, VaAlbert Nyakarombo vakatsinhira mashoko
aDr Munzverengwi vakatiwo vabereki vanofanirwa kugara vachiongorora mafambiro
uye hunhu hwevana vavo kuitira kuti vazvione kana vachinge vangotanga kutora
zvinodhaka.
Vakati: “Kutorwa kwezvinodhaka kuri kukanganisa hutano hwevana vedu uye vamwe
vacho vari kutorasika njere. Ngatigarei tichiongorora mafambiro avo kudzimba uko
tobatsirana neHurumende muhondo yekurwisana nekutorwa kwezvinodhaka iyo yave
dambudziko guru munyika."

Verified by MonsterInsights