NaTabeth John

MMUCHIITIKO chinosuwisa nekushamisa zvikuru mumwe murume wekwaMauswa mudunhu ramambo Dotito kuMt Darwin akadonherwa nemombe ndokufirapo.

Musi Gumiguru 22 nenguva dzemasikati mushakabvu Forget Machado (21) pamwe chete namai vake, Fungai Chingwena (63), vakasimuka pamusha pavo vachienda kugadheni kunodiridza mbeu yefodya.

Vachisvika pagadheni vaviri vakatanga kudiridza gadheni riye vachichera mvura patsime rakavhurika iro riri mamita anoita makumi matatu (30m) kubva pagadheni.

Vachidiridza kudaro mombe mbiri dzakasvika ndokutanga kurwisana dzichida kunwa mvura yakanga iri mumugoro wemvura izvo zvakazoita kuti imwe mombe idonhere pamusoro paForget akanga ari muchitsime.

Mai vaForget vachiona izvi vakazadzwa nekutya vakadedzera pamwe chete nekuchemera rubatsiro. Vamwe vanhu vakamhanya asi Forget chakanga chava chando.

Forget wakanga watofirapo. Sudden Chawamana ndiye akazomhanya kunoudza mapurisa eZRP Dotito avo vakazosvika vakaona mutumbi wemufi uchibva waendeswa kuchipatara cheKaranda Mission Hospital.

Vakasanobata chigaro chemutauriri wemapurisa wemudunhu reMashonaland Central, Assistant Inspector Lucy Chigwenhese, vakakurudzira veruzhinji kushandisa migoro iya inetambo kana vachichera mvura muzvitsime kudzivirira njodzi pane kupindamo.

New Ziana