Ukhwaze kwezwakala uMnu Ncube

UNGQONGQOTSHI weZansi yemaNdebeleni uMnumzana Abedinico Ncube
ukhwaze kwezwakala ngoLwesihlanu olwedluleyo lapho ekhuthaza amakhansela
amatsha ukuthi angabangi izikhundla kodwa balwisane lokuthuthukisa izigaba
zakibo.
Enkulumeni yakhe yokwamukela inkokheli ezintsha ezizasebenzela ekhansilini
yemakhaya eGwanda, uMnu Ncube uthe akumelanga bangene emsebenzini
begqoke amabhatshi epolitiki zangakibo.
“Ngingakalitshayeli ihlombe, ngithanda ukukhuthaza ukubambana lokuhloniphana
bantu bakithi.
“Ukuze sithuthukise izigaba zakithi kumele abantu basebenze ndawonye.
Angikhangelelanga ukubona kumbe ukuzwa ukuthi amakhansela asekhuluma
ngepolitiki lapha eCouncil Chambers.
“Le yindawo yokuhlanganisa amakhanda likhumisane ngokuthuthukisa izigaba zenu.
Ngiyazi ukuthi khona lizakhetha umgcinisihlalo lomsekeli wakhe. Lolokhetho
kalungalethi inzondano phakathi kwenu kodwa khethanani ngokwazana kwenu
ukuthi ngubani ongakhokhela isihlalo esithize.
“Ngiyazi bakhona oGilbert labo Miclas abamele olunye uhlangothi kodwa ngithi kibo
asisebenzeni ndawonye ngoba singabantu banye. Angiboni makhiwa lapha sonke
singabantu abamnyama,” kutsho uMnu Ncube.
Uqhubeke esithi ipolitiki kanye lokuchothozana akwakhi ngakho abantu abasebenze
ngokubambana kungakhathalekile ukuthi lowo lalowo ugqoke liphi ibhatshi
kwezepolitiki. Uthe uma bengasebenza ngokubambana langokusebenzisana
kungaletha ingqubekela phambili ezabelweni zonke abazikhokheleyo zeGwanda.
Ngalolo suku kugcotshwe amakhansela emakhaya angamatshumi amathathu lanye
(31). Abangamatshumi amabili lane (24) bakhethwe nguzulu ukuthi bamele ama
iziqinti zakibo kwathi abayisikhombisa bakhethwe libandla labo ukuthi bamele
ingxenye yabomama (women’s quota).
Ibandla elibusayo lithole izihlalo ezilitshumi lantathu (13), iCCC yathola isificamunwe
mbili (8) kwathi abathathu (3) yibo abangene bengamaqembu azimele wodwa.
Abayisikhombisa bonke bavelele kubandla elibusayo ele Zanu PF ngoba eliphikiso
ele CCC lingahambisanga amabizo abameli babo.