GWANDA – ZIHLALELE evalweni izakhamizi zika Ward 15 esigabeni seMaphula
ngaphansi kukasobhuku uZefania Moyo ngenxa yokutsha kwamanzi edamu labo
leMakapakapa osekufake impilo yezakhamizi kanye lenyamazana encupheni.
Ukuswelakala kwamanzi sekudale ukuthi izakhamizi zibe lokwesaba ngoba
zisengozini yokuhlaselwa yimikhuhlane efanana lesihudo ngoba zingatholi amanzi
aqondileyo kukanti lezinyamazana zabo zisengozini yokufa ngenxa yokuwoma.
UMaria Siziba oziphilisa ngokulima isivande duze ledamu uthi usegebhe umthombo
ukuze enelise ukuthelezela izilimo zakhe.
Mina njengomlimi oziphilisa ngokulima izilimo ngithengisa ukuze imuli Yami iphile
ngisele esikhaleni ngoba ngingasela ndlela yokuthi ngiziphilise ngitsho ngoba idamu
selingasela amanzi okuthi ngiqhubeke ngilima ngendlela osekutshe ngayo, kusitso
umaSiziba.
Omunye wezakhamizi ongazange athande ukuqanjwa ngebizo ucele abakhokheli
ukuthi bangenele edubeni oluhlasela izakhamizi.
Besicela abakhokheli bethu esibakhethileyo ekhethweni oseludlulile bakhangele
isimo esikhangelane laso njengesigaba basiphathise ngokusigebhela idamu lethu
ukuze lenelise ukubamba amanzi isikhathi eside, kusitsho umnunzana.
Labagcina inyamazana zasendle kwele Hwange National Park babika ukuba indlovu
zicaphela kwele Botswana zidinga amanzi.
Phambilini izanuse zomkhathi zibike ukuba lonyaka izulu lizaba lincane, ikanti
lamadlelo azaphanga ukuphela.
