Ngu Pinky Moyo
Ezake zadla ubhedu kweze nguqu iBlue Bombers isivuselelwe esigabeni seGaranyemba. Ukuvuselelwa kwalelo qembu kulethe intokozo kwabasakhulayo njalo sekuzabanika ithuba lokuba batshengise iziphiwo zabo.
Izakhamizi zika ward 13 ezisebenza elizweni lase South Africa sezamanyana zabona kumqoka ukuba iqembu le Blue Bomber livuselelwe.
Iqembu le Blue Bombers, belikhona phambilini likhokhelwa yizizwala zikaWard 13 ezibalisa uMfazo Moyo, Stagile Moyo ,Pagile Ncube lo Gc Maphosa, bonke laba sebadlula emhlabeni.
Ngemva kokuba abasunguli beqembu sebedlule emhlabeni iqembu labo laseliphelela emoyeni. Ngenhlanhla enkulu ngomnyaka ophelileyo izakhamuzi zakhumbula iBlue Bombers njalo bakubona ukuthi ingaphathisa abantwana bakulowo mango ukuze baveze iziphiwo zabo.
ULungile Nyathi, Give Chithe lo Nyambi Tshabalala yibo abavuselela iqembu leli ngoba bethakazelela umsebenzi owawusenziwa ngabadala, njalo bethakazelela ibizo elithi Blue Bombers.
Abasakhulayo sebethengelwe impahla zokudlala, ama boot amasokisi kanye lebhola labo .
Omunye wabadlali uMelusi Ndlovu utshengise ukuthokoza kakhulu ngokuba yingxenye ye Blue Bombers.
“Njengabadlali sinanzelele ukuthi yinhlanhla yethu ukuthola abasekeli abazimiseleyo ngathi ngakho ngithanda ukubonga kakhulu ngabasenzela khona ngisithi abaqhubekele phambili besenza okuhle” kutsho uNdlovu.
UNyambi Tshabalala yena uchaze ukuthi ukuvuselelwa kwalelo qembu akuqukethe ukudlala ibhola kuphela kodwa kulezifundo abazitholayo.
“Ekudlaleni sikhangelele ukuthi umkhokheli wabo ahlale labo phansi abafundise kancani ngokuziphatha kahle. Ukuthi njengo mntwana ongumfana osakhulayo kumele aziphathe njani lokuthi izidakamizwa asikho okwenza umuntu abonakale ukuhlakanipha” kutsho uTshabalala
Umqeqetshi waleli qembu uMnumzana Godfrey ‘Magreen’ Moyo yena ukhuthaza abadlali ukuthi bakuthathele phezulu lokhu ngoba kuyinhlanhla ukuthola ithuba elinje
“Kuyinhlanhla enkulu kakhulu ukuthola izakhamizi ezifisa ukuthuthukisa isigaba ngokwenza umsebenzi onje ngakho singayekeli inhlanhla enje idlule ngoba nxa besafisa ukusincedisa emdlalweni wethu singacina sesiyenza into enkulu” kutsho uMoyo.
ULungile Nyathi ongomunye wabavuseleli ukhulume ngenjongo yabo yokuvuselela leli qembu njalo uthi ufisa ukuba intsha ithuthuke ikakhulu kwezemidlalo.
“Ekuvuseleleni iqembu le Blue Bombers silenjongo yokutshengisa intsha ukuqakatheka kwesiphiwo abalaso ekudlaleni ibhola njalo bazi ukuthi akupheleli esikolo kuphela. Bengenelisa ukuthola umsebenzi wokudlala kumaqembu aphezulu,” kutsho uNyathi.
Inkokheli zomdlalo ziyanxusa abantu ukuba babuye ngobunengi bezosekela iqembu le Blue Bombers ngoba kuyinto yomphakathi.
