Bantu bamu Empumalanga Phase 4 mu Hwange baba mwezi nkabatakwe manzi musule akuti
be Zimbabwe National Water Authority (ZINWA) bakanunsula mita yamanzi itola ku
Hwange Local Board nkambo kacikweleti caama miliyoni alimakuumi obile alamusamu
atutatu.
Be Local authority bakalibati imali yamanzi ye Zinwa teyakabalwa obotupe nkambo be Local
Board bakalecikweleti cilimbuli mamiliyoni alimusamu atune tulatune pesi bakali babbadala
kale amwi mamiliyoni alimusanu akamwi alakamwi.
Basimabbuku bakuHLB Town baNdumiso Mdlalose bakati be Local Authority bayeyela kuti
imita yamanzi kuZinwa yakalifwide alimwi kuyandulisisya kulikwetwa akutamvwanana
kulikucitwa.
“Kutobelezya kununsulwa kwe mita yamanzi abantu beZinwa nkabanunswida bantu bamu
EMpumalanga ku Phase 4 mumviki zyinda, balikusungilizigwa bantu kuti kwindila
mumalembe abe kansili kulikutondezya kuti kulikutamwvanana kwindila kumali yamanzi
yeZinwa antomwe emali yamanzi ilangene abantu bamu Empumalanga,” bambobo.
Empumalanga Phase 4 mbusena bupya pesi mumazuba ayinda ibantu balikubelesya manzi
azwa ku Zinwa nkatola ku Local Board muciindi nkabatana kununsula mita.
Kwalino be Local Board mbabo balikupa manzi ebbawuza kubantu be Empumalanga Phase
4 nkabaccibona zyakuccita.
BaMdlalose bambakuti cikweleti ccabo kuZinwa ma miliyoni alimakuumi obile anukuti
ibantu belede kubbadala mamiliyoni alimusanu atune alatune ku kansili.
Basikuti be Local Authority balalitolela kubalwa kwamamita kuccitila kuti kubalwa
kweZinwa kwendelane akubalwa kwe Kansili.
Bambakuti beKansili binkilila kunembo nkabayanda kujana mali yamanzi ngibalikupegwa
eZinwa.
“Cikweleti ceKansili cama miliyoni ali musanu atune alatune ncibalacco bakabbadala
mamiliyoni alimusanu akamwi alakamwi, mukukazanya ama risiti email ili mamiliyoni atatu
alamusanu aatubili azwa kubantu bamu Empumalanga Phase 4. Limwi bbazu ibantu be
Empumalanga balacikweleti ku Kansili cama miliyoni obile alatune.
“Ibe Kansili balikubeleka amanguzu onse kuti bajane ezyo zilikweta kutamvwanana akati ke
cikweleti ca Zinwa ecikweleti camanzi cilikutegwa cakabelesegwa abantu be Empumalanga
Phase 4. Kuyandulisisya kwabo kulikutondezya kuti mamita aZinwa aalikutola manzi
kubantu be Empumalanga Phase 4 alakonzya kuti akalifwide, nkinkako ezi nzizyo zilikweta
kutamvwanana,” wambobo.
Be Local Board balikuti balikwezya kulangisisya loko kulabo balezikweleti, nkabala
bulangilizi bwakuti bapemanzi kulabo babbadede.
BaMdlalose bakati kulangisissya oku kwatondezya kuti mali yamanzi kuZinwa yalikutanta
amwezi amwezi kwinda mali yamanzi yabantu beMpumalanga Phase 4.
BaMdlalose bakumbilisya bantu bamuMpumalanga kuti babbadale mali zyamanzi cindi
nkaciliwo kucitila kuti be Local Authority bakonzye kusika acizuminano caabo abe Zinwa
nkabaciyandula nzila yakumaninizya.
