Ngumlobi owe Times
IZimbabwe Pavilion ilindele izivakatshi ezingaba yizigidi ezintathu phakathi kombukiso wezinyanga eziyisithupha omude owe Expo 2025 Osaka eJapan.
Kulindelwe izivakatshi eziyizigidi ezingu 28.2 ezivela emazweni angaphezu kwe 150 embukisweni womhlaba wonke ozaqala mhla 13 kuMabasa kuze kube 13 kuMfumfu 2025 eOsaka, esifundazweni sase Kansai. Lo mbukiso uzaba ngaphansi kwendikimba ethi: “Ukuklama umphakathi wesikhathi esizayo ezimpilweni zethu.” Indikimba yeZimbabwe Pavilion ithi: “Ngale kwemingcele.”
Esethulweni sakhe kuwebhusayithi yeZimbabwe Pavillion kanye lokukhulumisana labaphatheke kwezokuvakatsha kuviki edluleyo, uCommissioner weZimbabwe Pavilion uGeneral Allan Majuru uthe injongo yabo enkulu yikuthuthukisa umkhankaso weBrand Zimbabwe ngokubukisa okutshiyene kwenhlalakahle, amasiko kanye lokusebenzelana lamanye amazwe.
“Sifuna ukuthuthukisa amathuba eZimbabwe okuthengisa, ukutshalwa kwezimali kanye lokuheha izivakatshi. Ukulinganisa ukunikezwa kwemikhiqizo yaseZimbabwe kanye lezinqubo ngokumelene lezindlela ezihamba phambili zamanye amazwe.
“Sifuna ukuqoqa ulwazi mayelana lezinto ezintsha zakamuva kanye lendlela yokuzisebenzisa esimeni saseZimbabwe ukuze sifinyelele imigomo yethu yeSustainable Development Goals (SDGs),” etsho.
IExpo 2025 ibeka phambili ama SDG ngomthelela womhlaba.
UComm. uGeneral Majuru uthe ngemva kombukiso, iZimbabwe ikhangelele ukuthi inani labafikayo likhuphuke ngamaphesenti alitshumi lanhlanu ngomnyaka, izivumelwano zokuthengiselana ngetshumi, izivumelwano zokutshalwa kwezimali ezibhalisiweyo ngamaphesenti alitshumi kanye lokwakha ubudlelwano obutsha.
Ekhuluma emhlanganweni ofanayo, uPermanent Secretary owe Ministry eye Tourism le Hospitality Industry, uDkt. Takaruza Munyanyiwa uthe ukubamba iqhaza kulo mcimbi kuhambisana lesu lesikhathi eside lomnotho wezwe lokuheha abatshali bezimali bakwamanye amazwe, ukukhulisa ukuthengwa kwempahla emazweni angaphandle, kanye lokugqugquzela ukukhula okuqhubekayo ngaphansi kweVision 2030.
Wengeze ngokuthi ukuzibandakanya kwezinkampani ezizimele kubalulekile ekwenzeni umbukiso womhlaba upumelele.
UDokotela Munyanyiwa uthe ngokukhuthaza ubudlelwano, iZimbabwe ingasebenzisa iExpo ukuthuthukisa ezokuvakatsha, ezohwebo lokutshala izimali, ukusungula amamakethe amatsha, kanye lokuqhubekisela phambili imigomo yayo yokuthuthukisa izwe.
“Sikholelwa ukuthi njengomkhakha wezokuvakatsha, kulesidingo sokusebenza ngokuzikhandla ukuze siqinisekise ukuthi sikulungele kahle ukukhombisa ngezokuvakatsha kanye lokupakitsha iZimbabwe njengendawo ethandwa kakhulu yizivakatshi. Kusukela emvelweni yethu emangalisayo kusiya kumafa ethu aqhakazile, silethemba lokuthi ezokuvakatsha zethu eziyingqayizivele zizanikeza isithombe esihlala egqondweni zabantu emhlabeni jikelele,” etsho.
UPermanent Secretary, owe Ministry eye Foreign Affairs le International Trade, uAmbassador uAlbert Ranganai Chimbindi uthe bazasebenzisa iExpo 2025 njengethuba elihle lokuxoxisana, ukuphinda bahlanganyele kanye lokuqinisekisa kabutsha, ukwandisa ubudlelwano bomhlaba kanye lokufinyelela kwama diplomatic.
“Futhi kusinika ithuba elihle lokukhombisa imizamo yethu eqhubekayo yokuthuthukisa ukwenza ibhizimusi kalula, njengoba sakha indawo ekahle yokutshalwa kwezimali, ezohwebo, kanye lezamabhizimusi, sivumelane lemizwa yamakhilayenti ethu.
“Ukuhlanganyela kwethu kuloMbukiso kugcizelela ukuzibophezela kwethu ekubeni ngumdlali obalulekile emhlabeni jikelele, njengoba siqhubeka lokugqugquzela indawo evumelana lebhizimusi, ukwenza izinguquko, lokubeka iZimbabwe njengendawo yokutshalwa kwezimali, ezohwebo, lezokuvakatsha emhlabeni jikelele. Ngiyalikhuthaza lonke ukuba liqaphele ukubaluleka kwaloMbukiso wakusasa weZimbabwe,” etsho.
UAmbassador Chimbindi uthe ezokuvakatsha, zisalokhu zihamba phambili kwezomnotho eZimbabwe, zilomthelela omkhulu ekudaleni amathuba emisebenzi kanye lokukhula kweGDP.
Wengezela: “Ifa lethu elicebile lamasiko, izindawo ezimangalisayo, lezindawo ezikhangayo ezidume umhlaba wonke njengeMosi oa Tunya (Izimpophoma Eziphakeme ZaseVictoria), iGreat Zimbabwe, kanye leHwange National Park kwenza izwe lethu libe ngumdlali omkhulu kwezokuvakatsha emhlabeni wonke.”
Ugatsha lukahulumende olwe Ministry eye Foreign Affairs le International Trade luphathiswe ukukhuthaza kanye lokuvikela izithakazelo zeZimbabwe emazweni omhlaba.
