Ngu Liberty Mutamba
Abasakhulayo kwele Gwanda South balemilomo ezinkulungwane yokubonga ukuvulwa kwezifundo zokuba ngo nogada endaweni yakibo, nanko ke sekuqhatshwe phose ikhulu, kulabo abangena kulezo zifundo.
Ukuletha iMabaleka Security Company endaweni yase Gungwe lase Nhwali sekubone abangamatshumi ayisitshiyagolombili lanhlanu (85) bengena kulolo hlelo, abafika amatshumi ayisikhombisa (70) sebathola imisebenzi emadolobheni abaliwa iGwanda, iBeitbridge, iBulawayo kanye le Gweru.
Ukuvulwa kwekhampani ye Mabalela Security kube liphupho elikhulu ku Emmanuel Masuku obengomunye wabafundi. UMasuku lijaha elidabuka eMlambapele, uchaze ukuba ukuqhuba izifundo zobu nogada kuzamvulela amathuba omsebenzi.
“Ngathi ngisizwa ukuthi sekuvulwe ikhampani yokuqeqetshisa onogada ngasukumela phezulu. Sengibone ontanga bami bethola umsebenzi ngaloluhlelo. Sekuncede njalo ukuthi singatshoni sizulazula singenzi lutho. Ngiyananzelela njalo ukuthi kuzaphungula ukuthathwa kwezidakamizwa ngaba sakhulayo,” kubika uMasuku.
UMemory Dube owesintwana uthi labo njengabesintwana bengazitholela imisebenzi sekungaphunguleka ukuzithwala okuvamileyo emaphandleni okwamantombazana amancane.
“Sengananzelela ukuthi ontanga bengaswela imisebenzi yikho lapho abaqala ukuhlupha ezigabeni. Abanye bethu bayengwa zimali ezingatsho lutho ngoba bengelayo eyabo lokhu kubenza becine bezithwala bebancane. Kukalutshwane ukuthi utshontshe nxa umuntu ezitholela imbijana yakhe. Ngakho ke bengathola imisebenzi bazenelisa ukuzithuthukisa njalo isigaba sikhule siyephambili,” kubika uDube.
Ngeviki ephelileyo abalitshumi lasitshiya galolunye baqede izifundo lezi banikwa izithupha zokuba ngonogada.
Okhokhela iMabelaka Security Company umnumzana Adson Ncube oseleminyaka embalwa engu nogada uthi wavula izifundo lezi ukuze ancedise abasakhulayo ukuthi bazivulele amathuba omsebenzi.
“Ngabona ukuthi abasakhulayo batholakala sebelamacala bebancane becine bengasenelisi ukuthola imisebenzi abayifisayo. Ngase ngibona ukuthi kungcono ngiqeqetshise abasakhulayo emaphandleni. Namuhla sekulabantwana phose ikhulu elangena kuloluhlelo njalo inengi labo selathola imisebenzi.
Okuqakathekileyo yikuthi bethembeke njalo besebenze ngokuzikhandla. Ngibonga ukwamukelwa yibukhokheli bomdabu balumhlubulo njalo ngifisa ukuncedisa abasakhulayo ukuba bengatshoni bengezi lutho,” kubika uMnu Ncube.
Omele abantu be Gwanda South Constituency edale lephalamende njalo engumsekeli kaMinister kwezokwethulwa kwemibiko, lokusakazwa kwemibiko uHon Dr Omphile Marupi obone iqembu leli linikwa izithupha zobunogada uthe uhlelo lolu luthuthukisa ontanga.
“Uhlelo lolu luncedisa kakhulu ukuthuthukisa ontanga ukuze bengathathi izidakamizwa. Ontanga benelise ukuzitholela imisebenzi njalo bezithuthukisa. Ubusela obusezigabeni sikhangelele ukuthi buyehle ngoba sesilamasotsha emakhaya. Abasakhulayo bazenelisa ukuzithuthukisa ngemisebenzi efana laleyi,” kusitsho uHon Dr Marupi.
