MUTARE-Kanzuru yeguta reChipinge yapedza kuvaka imba yekudzidzira paSt Kelvins Secondary School
apo chirongwa chekunyoresa vana vechikoro ichi chiri kutarisirwa kutanga gore rinouya.
Sachigaro wekanzuru yeChipinge, VaLovemore Mkwapati, vanoti chikoro ichi chakavakwa
pachishandiswa mari yeDevolution chine bhuroka rimwe chete rine makamuri matatu ekudzidzira
pamwe nemahofisi akagadzirira kunyoresa mwana wefomu yekutanga pakarenda yegore rinouya.
“Tiri kufadzwa nebudiriro yakaitwa pachikoro chekanzuru ichi bhuroko imwe chete nenzvimbo
yekugezera yakapera uye yatogadzirira kunyoresa vanhu vekutanga. Tiri kutarisira kutanga chirongwa
chekunyoresa temu inotevera tichigadzirira karenda rezvikoro ra2024,” vakadaro.
VaMkwapati vakarumbidza zviri kuitwa neHurumende mukukoshesa kuvandudzwa kwezvivakwa zvikuru
mumadhorobha madiki anorima seChipinge.
Zvakadaro, akakasira kuramba makuhwa ekuti chikoro ichi chaitwa muzinda wekudzidzira mabasa
emaoko achiti chaive hurongwa hwenguva pfupi hwemwedzi mishoma.
“Tinozviziva kuti paita zhowe-zhowe panyaya yekuti chikoro ichi chiitwe nzvimbo yekudzidzira.
Kungobvisa mhepo chete, chikoro chiri kuenderera mberi nebasa racho asi sezvo hatisati tavhura mikova
kuvana vechikoro takaita gadziriro dzenguva pfupi dzekuti nzvimbo yekuvakisa ishandiswe senzvimbo
yemabasa emawoko sezvo nzvimbo yekudzidzira ichiwana tsoka gore negore. kupera,” vakadaro
VaMkwapati.
Zvichakadaro, musika wemuriwo wekuChipinge uyo unogara vatengesi vanodarika mazana maviri
wakapera uye wave kuda kutangwa munguva pfupi iri kutevera.
VaMkwapati vanoti chivako ichi chakavakwa nemari inosvika zviuru makumi masere zvemadhora
chakabatsira zvikuru kubvisa vatengesi munzvimbo dzavasina kutara muguta.
“Tichangobva kuvhura musika wemuriwo wevanhu uyo unogara vatengesi vanosvika 200 uye izvi
zvatibatsira kuderedza huwandu hwevanotengesera mumigwagwa zvisiri pamutemo. Tinofara zvikuru
nebudiriro ichangoburwa iyi,” vakadaro.
Akawedzera kuti musika webio-digester wakashanda zvakazara nekudaro unokurudzira kufambiswa
kwemarara panguva imwe chete uchiwana mari kuvakuru venzvimbo.
“Bio-digester yedu yava kushanda zvizere. Iyi digester iripo inogadzira marara ese anoparara kubva
kumusika kugadzira methane gasi. Iri ndiro gasi ratinotengesa sekanzuru kuitira kuti tiwane mari kubva
mubindu rinobva kumusika wemuriwo,” vakadaro.
