Sharon Chigeza
MUTARE-Mapurisa eZimbabwe Republic Police (ZRP) ayambira zvikuru pamusoro pezviri kuitwa nevemakombi pamwe nemahwindi avo vari kushungurudza vanhu pachiteshi chemabhazi maMutare.
Zvichitevera mishumo yakawanda yemhirizhonga nekushungurudzwa, mapurisa akashora kuwedzera kwekusateerera mutemo mumashoko akaburitswa svondo rapfuura.
“Vafambisi vezvifambiso vanofanira kumira kupinza basa matsotsi aya anotyisidzira vafambi, anokonzeresa kutsvikinyidzana, nekubira nzira. Tiri kusimbaradza hurongwa hwekugadzirisa zvinhu, uye vanopara mhosva vachasungwa votongwa,” chirevo chemapurisa chakaverenga.
Kunyange hazvo zvinhu zvamboitika kare, zvinhu zvichiri kunetsa, zvikuru kuHarare-Mutare Old Rank neMudzviti Rank, uko kunogara vanhu vachityisidzirwa zuva nezuva.
Vafambi vakawanda vakarondedzera zvakaitika zvinokatyamadza pamaoko emhwindi aya.
“Ndakamanikidzwa kupinda mubhazi nevamwe varume vaipopota. Vakatora bag rangu pandakaramba kukwira. Ndakatya,” akadaro Tendai Moyo. “Hazvichakodzeri kufamba. Madzimai, kunyanya, anonangana nekushungurudzwa uku,” akawedzera.
Mhirizhonga iri mumarenki iri kuwedzera nekuda kwekurwisana kuri kuitika pakati pevakuru vezvifambiso, muzvinabhizimisi nenyanzvi munyaya dzezvematongerwo enyika Esau Mupfumi naLeonard Mukumba, muridzi weInter-Africa Bus Services. Hondo yavo yekudzora nzvimbo dzekutakura zvinhu yasvika pakurwisana, ichisiya vafambi vabatwa mumhirizhonga.
Muna Chivabvu 2024, kunetsana uku kwakashanduka kuve mhirizhonga apo mukuru wemahwindi akarohwa nevanofungidzirwa kuti vaikwikwidza. Zvichida kutsiva, zvikwata zvemabhazi zvakapinda nechisimba muchiteshi chebhazi vakabata mapanga, simbi, nematombo, vachirwisa vafambi nevaikwikwidzirana navo. Vakuru vehurumende vakapindura nekusunga vanhu makumi maviri nevaviri vaifungidzirwa kuti vanosanganisira Mupfumi pachavo, uye kutora zvombo nemotokari dzekutiza dzakashandiswa pakurwisana uku.
Vemabhizimusi venzvimbo dziri pedyo nezviteshi vanonzi varasikirwawo nenyaya yemhirizhonga iyi.
“Hatigone kushanda nemazvo kana paine kurwa nekutyisidzirwa kuri kuitika kunze kwemasuo edu. Zvinovhundutsa vatengi,” akachema-chema mumwe muridzi wechitoro uyo aida kusazivikanwa nezita rake.
Kurwisa dambudziko iri, veZRP vavimbisa kuti vachasimbaradza mashandiro avo.
“Takazvipira kuona kuchengetedzwa kwevagari vedu. Avo vanofunga kuti vanogona kuenderera mberi nekutyisidzira vafambi vachasangana nekutsamwa kuzere kwemutemo, ”akadaro mapurisa.
Zvisinei nekuvimbiswa uku, kutya kwevafambi kunoramba kuri pachena.
“Pose pandinofamba, ndinotyira kuchengeteka kwangu. Zvakafanana nesango kunze uko. Tinoda mhinduro, kwete zvivimbiso chete,” akadaro Melania.
Vafambi vari kudaidzira kuti zviitwe nekukasika kugadzirisa mhirizhonga yatekeshera pamwe nekushungurudzwa izvo zvaita kuti kufamba kuve nenjodzi. Veruzhinji vane tarisiro yekuti mapurisa achaita zvavanenge vavimbisa uye kuti vapari vemhosva vatongwe nematare edzimhosva, kuitira kuti vanhu vese vave nenharaunda isina njodzi.
