Anobatwa chibharo nehama yepedyo

MARONDERA- Musikana ane makore gumi nemashanu wekuPlot 27 Hit Beast Farm
kuFeatherstone akabatwa chibharo nehama yake munguva pfupi ichangodarika.
Zvinonzi mukati memwedzi waChikumi wegore rino panguva dzemasikati dzezuva risiri
kuzivikanwa, mumhan’ari aive pamba nemupari wemhosva uyo ane makore asiri
kuzivikanwa apo akatumwa kunotora nharembozha muimba yokurara nababamukuru vake.
Paaive mukati, mupari wemhosva uyu akamutevera ndokubva avhara gonhi pamwe
nekudhonza mwanasikana uyu achibva amusungwa maoko netambo inofambisa moto
wezuva.
Akazomubata chibharo ndokubva panzvimbo iyi mushure mekupara mhosva iyi.
Mumhan’ari, uyo anonzi ane makore anosvika kugumi nemashanu, akazodzokera kumba
kwavo uko akasvikotaurira sisi vake pamusoro pechiiitiko.
Mushure mekuudzwa nezvechiitiko ichi, zvinonzi hapana kana mumwe
akazombonyeurirwawo nezvacho.
Nyaya iyi inonzi yakazobuda pachena mushure mekunge mapurisa epaFeatherstone
anyeverwa nezvechiitiko ichi vachibva vatanga kuita tsvagurudzo dzacho idzo dzainge
dzichiri kuenderera mberi panguva yekunyorwa kwenyaya ino.
Mumiririri wemapurisa muMashonaland East, Inspector Simon Chazovachiyi vakatsinhira
chiitiko ichi vakaenderera meberi vachikurudzira veruzhinji kuti vasavimbe chero nemunhu
zvake kunyangwe akava weukama.
Vakakumbirazve avo vangave vaine ruzivo nezvenyaya iyi kuti vabatsire mapurisa
kubudikidza nekubudikidza humbowo hungaite kuti vakwanise kusunga mupari wemhaka iyi.