MARONDERA- Munyori wekusimudzirwa kwedunhu reMashonaland East, VaTavabarira Kutamahufa
vanoti vanofadzwa zvikuru neshanduko iri kuitika mudhorobha reMarondera iyo yaona kuvakwa
kwezvinhu zvakawanda nenguva dikidiki.
Vakataura izvi pavakafamba vachiona budiriro iri kuitika muzvivakwa pamwe nemamwewo mabasa
muguta iri svondo rakapera.
Vachitaura nevatapi venhau mushure mekutenderera pachivakwa ichi, VaKutamahufa vakati ivo
chivakwa ichi chichanakisa nzvimbo yeMarondera sezvo inenge yashongedzwa zvakanyatsonaka.
Vakatizve zvichaita kuti nyaya dzezvemabhizimisi mudhorobha iri dzinge dzichisimukira sezvo paine
makambani ane chitsamha achange achiitira mabasa awo pamuzinda uyu.
Mamwe emakambani anenge aine mahofisi nezvitoro pachivakwa ichi anosanganisira Bon Marche,
Bola Hardware, ZINARA, Surrey, ZETDC nemamwewo.
"Chivakwa chitsva ichi chiri kunyatsokwenenzverwa uye misikidzo yacho yakanaka zvekuti
Marondera ichange yanyatsoshongedzeka. Izvi zvinofadza zvikuru sezvotichiiona kuti kuvhurwa
kwezvitoro nemizinda yemakambani akasiyana-siyana kuchaita kuti vagari vemuno vawane mabasa
pamwe nekuva nesarudzo yakawedzerwa kana vachinge vave kutenga zvavanoda,” vakadaro
vaKutamahufa.
Mukuru ari kuona nezvekufambiswa kwemabasa pakuvakwa kwemuzinda wezvekutengeserana uyu,
Engineer Lloyd Ngoro vakati vanotarisira kuti kuvakwa kwawo kuchange kwapera mukati memwedzi
waKurume.
Vakati: “Basa riri kufambira mberi zvakanaka chose uye pangosara zvishoma zvinoda kubatwa-batwa
kuti muzinda kuti kuvakwa kwemuzinda uyu kunge kuchipera. Tinotarisira kupedza muKurume uye
munaKubvumbi, vemabhizimisi vanenge vatotanga kuvhura zvitoro zvavo kuruzhinji.”