Insuku zokuqhubela amapholisa imibhobho engekho emthethweni zengezelelwe

Amapholisa Esabelweni seMidlands anike abantu abalemibhobho lezinye izikhali ezingekho
emthethweni elinye ithuba lokuyazitshiya emapholiseni, lapho abangasoze babuzwe ngazo.
Ithuba lokuhambisa izikhali emapholiseni laqala mhlaka-13 Mfumfu njalo laliphela mhalaka-15
Mfumfu.
Isikhulumeli samapholisa u-Inspector Emmanuel Mahoko uthe, “Lesi yiso isikhathi lapho
abalemibhobho, izikhali kanye lokunye okuyingozi okungekho emthethweni abavunyelwa khona
ukunika amapholisa bengasoze bebotshwe”.
Uthe loluhlelo lwenziwa elizweni lonke, kanye lakuzwekazi leSADC kulandelwa imithetho
yokuvikela lokulawulwa kwemibhobho lezikhali. U-Inspector Mahoko uthe “Sekunanzelelwe
ukuthi eminye imibhobho iqala isemthethweni kodwa ngenxa yenguquko ezithile, ukugcina
kumbe ukutholakala ulemibhobho enjalo kucina kusiba licala nxa kukhangelwe umthetho”.
Ezinye zezibonelo zenguquko zigoqela amankampani avalwayo kodwa amalunga awo asala
egcine imibhobho yawo, amanye amalunga amaqembu ezemibhobho angasaphatheki kunhlelo
zalawo amaqembu, kanye labantu abalencwadi zokuphatha imibhobho kodwa bengasazivuseleli.
Abanye yilabo abalemibhobho engabhaliswanga abayithola ngendlela ezingekho emthethweni.
U-Inspector Mahoko uthe ubugebengu obenziwa ngabantu abahlomileyo buvamile ezigabeni
njalo izakhamizi zesaba ukuba lapho okudalwa khona amacala kusetshenziswa imibhobho
U-Inspector Mahoko uqhubeke esithi, “Ngakho-ke, kuqakathekile ukuthi imibhobho yonke
yazakale ukuthi ikubani. Inkamba zonke zamapholisa esabelweni ziphatheka kuloluhlelo.
Ngalokho, izakhamizi zikhululekile ukuyatshiya imibhobho engekho emthethweni kuloba yiphi
inkamba yamapholisa eseduze lazo. Akula umuntu ozabotswha ngesikhathi kuqhutshwa
loluhlelo”.
Uthe abantu abazaqhubela amapholisa imibhobho engekho emthethweni bazaphiwa izincwadi
ezifakaza lokho. Labo abafanele ukuba lemibhobho bazancediswa ukuze baphathe imibhobho
ngokusemthethweni.

Indaba le ihumutshelwe elimini lwesiNdebele yiMidlands State University National Language
Institute.