Isidumbu seZhombe esikhulumayo

Ingxaki ephathelane lokubulawa kukatsheketsha oweZhombe isiguqukile njengoba imizamo
yokumngcwaba isiyehlule ngemva kokuba umuyi esezivezile kwesinye isihlobo sakhe edinga
ukuthi izitho zomzimba wakhe ezakhitshwa kuye zibuyiselwe.

Umuyi uMunyaradzi Mvurumo bekufanele ukuthi angcwatshwe ngoLwesine olwedluleyo emzini
kamalume wakhe kodwa lokhu akusenzakalanga ngemva kokuthi ezivezile phezulu kwesinye
isihlobo sakhe edinga izitho zomzimba wakhe ezakhutshwa kuye.

UMvurumo owatholakala emgodini ongasasebenzi eZhombe ngemva kokunyamalala okwensuku
ezingu-21 usefikise inyanga ezimbili elokhu engakangcwatshwa kulandela ihungahunga lokuthi
unika imilayezo yokuthi kafuni ukungcwatshwa.

Umzimba kamufi wahlala emnyango kalowo osolelwa ukuba nguye owambulalayo okwamaviki
amabili andubana izimuli ezilwayo zenze isivumelwano sokuthi bahambise umzimba wakhe
emotsha ngemva kokuba udaba selungenelwe ngabakhokheli bomdabu kanye lamapholisa.

Ngemva kwemihlangano emide, izimuli ezilwayo zavuma ukuphetha udaba ngokuthi umuyi
angcwatshwe ngoLwesine lweviki ephelileyo kodwa lokhu akusenzakalanga.

Induna uNjelele uthe, “Yebo, liqinisio ukuthi sikhangelane lodaba lolu osolube yindaba
egudwini kulindawo. Sasivumelane ukuthi umuyi angcwatshwe ngoLwesine kodwa imizamo
yethu yehlule. Umuyi waziveza phezulu kwesinye isihlobo sakhe edinga ukuthi izitho zomzimba
ezakhutshwa kuye zitholakale. Bekusenziwa imihlangano ilandelana kuzanywa ukuthi
kuxazululwe udaba lolu. Sesivumelane ukuthi umzimba uyehlolwa njalo eHarare ukuze
kubonakale imbangela yokufa njengoba ukuhlolwa okwenziwa koBulawayo kungenelisanga
ukupha impumela esuthisayo.”

Izihlobo zikamuyi ezecele lakonina ezazilungiselele umngcwabo zaphoqeka ukuthi zigqibele
ingcwaba ezaseseziligebhile ngemva kwendaba ethi umuyi ufuna ukungcwatshwa lapho
okulosendo lwakhe.

NDEBELE

Induna uNjelele yengeze yathi, “Umama wejaha leli wabhubha ngemva kwensuku eziyithupha
ezelwe. Akula loyedwa omaziyo uyise. Ngakho, uziveza esebenzisa isihlobo sakhe esitshela
ngoyise okuthiwa uhlala eGweru. Uthi ufunwa ukungcwatshwa koyise, ngakho omalume bakhe
sebeze bama ukulungiselela umngcwabo”.

Ukufa kukatsheketsha lo okuthiwa wabulalwa ngabantu ababefuna ukwenza imithi ngaye
sekutshiye izihlobo ziphicekile lapho zilinde ukuphethwa kwalindaba ekhanya ingakabi
lesixazululo.

Indaba le ihumutshelwe elimini lwesiNdebele yiMidlands State University
National Language Institute.