IZIVANDE zibambe impilo zezakhamizi zezabelweni zeGwanda north.
Isivande lesi sibizwa kuthiwa yiSabajimba irrigation Scheme sasungulwa yinhlanganiso
ezimele yodwa iCARE lapho ibona ukuzimisela kwabalimi bakuleyo ndawo ekulimeni. Inani
labalimi besivande lesi balikhulu elilamatshumi amabili lesifica minwe mbili .
Omunye wabalimi ongumsekeli kamgcini sihlalo kuleyo ngadi uGladys Mkhwananzi
oyaziwa ngokuthi "NaKhumbu" uthe ubonga ukusungulwa kwengadi ngoba kumncedisa
kakhulu ukuthi aziphilise yena kanye lemuli yakhe ngoba esenelisa ukuthi athengisa ezinye
zezelimo zakhe .
Ukusungulwa kwengadi leyi kudlala indima enkulu kakhulu empilweni yami ngoba
kungiphathisa kakhulu ukuthi imuli yami ingabulawa yindlala.
Ngiyathengisa izilimo kubomakhelwane abaseduze ngibuye ngiwodisele labathengisela
edolobheni le Gwanda kutsho u Gladys Mkhwananzi.
Omunye wabalimi uNobuhle Gumpo uncome kakhulu isivande sabo ngoba ethi siyisibusiso
kubo ngenxa yokuthi umangoye kasalali eziko badla basuthe abuye afundise labantwana
ngemali ayizuzayo.
Selokhu yasungulwayo leyingadi lomangoye kasalali eziko, sithola ukudla okufaneleyo
labantwabami ngibuye futhi ngibafundise ezikolo ngemali engiyithola ekuthengiseni izilimo
zami"kutsho uNobuhle Gumpo.
Umlimi wesithathu umnunzana Fedelis Moyo uthe ingadi imnika isibindi ngoba esenelisa
ukuthola imfanelo zemuli yakhe.
Njengobaba ozimiseleyo ekondleni imuli yakhe ngizwa ngisiba lesibindi ngenxa yenzuzo
elethwa yingadi leyi" kutsho umnunzana Moyo.
Umsekeli kamgcini sihlalo uMkhwananzi ubuye waveza lobunzima obuhlangana labalimi
kuleyo ngadi abakenelisi ukuthi bathole amanzi eduze. Ubuye wathi abanye babalimi
sebengabantu abakhulileyo okucina kuletha ukukhathazeka ekuthwaleni amanzi
okuthelezela izilimo kubangelwa yikuswelakala kwamaphayiphi okuhambisa amanzi
ematankeni aseduze labo ngoba lawa ababelawo engasasebenzi kuhle.
Amaphayiphi adonsa amanzi esisa ematankeni aseduze kunye lephayiphi edonsa amanzi
asuka edamu awasasebenzi kuhle.
Amanzi sesiwathatha katshana kakhulu njalo silima labantu abadala asebekhulile okucina
kusenza impanbaniso enkulu ekusebenzeni kwabalimi" kutsho u Gladys Mkhwananzi.
Besicela uncedo kuHulumende lakwezinye inhlanganiso kanye labangenelisa ukusincedisa
sithole amaphayiphi okudonsa amanzi ukuze sikwanise ukuqhubeka sisebenza
sisiyaphambili sithuthukisa ilizwe kanye lesigaba sethu kusitsho unkosazana Mkhwananzi.
