SHONA — Mutungamiriri weNational Council of Disabled Persons of Zimbabwe (NCDPZ), Muzvare
Annah Shiri, vakasarudzwa zvakare kuve seneta anomiririra vanorarama neurema.
Maererano nezvakabuda musarudzo zvinova zvakaziviswa neZimbabwe Election Commission (ZEC),
musi weMugovera wapfuura, Muzvare Shiri vakapiwa basa iri kwemamwe makore mashanu
mushure mokunge vawana mavhoti zana nemakumi maviri nemasere (128) vachikunda vamwe vana
vaikwikwidzana navo.
Nasper Manyau akawana mavhoti makumi mana nemanomwe (47), Lilian Gwanyanya akawana
mavhoti masere (8), Mercy Maunganidze akawana mavhoti makumi matanhatu nematatu (63) uye
Vongai Mutokoti akawanawo mavhoti mashanu (5).
Muzvare Shiri inyanzvi yakahwina mibairo yakawanda munyaya dzezvevanorarama neurema,
vanobatsira vanotambura, murimi, mudzidzisi, uye vanoita zvematongerwo enyika.
Vane ruzivo rwezveutungamiriri rwakadzama muzvikamu zvehurumende nemapoka akazvimirira,
zvisinei nokushanda kwavanoita nezvikwata zvevanorarama neurema hwakasiyana-siyana munyika,
mudunhu rino reAfrica nepasi rose.
Vakabatsira muurongwa hwekunyorwa kweBumbiro reMitemo reZimbabwe nereParamende yePan-
African.
Pavaiva muhofisi yeutungamiriri, vakapinda musangano weUNCRPD pamuzinda weUN muNew York
uye vakakurudzira kuti nzvimbo dzokutandarira dzive dzinosvikika nevanhu vose zvisinei nokusiyana
kwavo munyika yeNepal.
Muzvare Shiri, munhu akazvipira uye anogara ari mune zvekodzero dzevanhu vanorarama neurema.
Munguva pfupi ichangopfuura vakapinda mumusangano weWorld Women's Assembly
wevanhukadzi vanorarama neurema muSouth Korea.
Vane muono wokuda kushandura upenyu hwevanorarama neurema muZimbabwe. Nokudaro
vakabatsira vanhukadzi nevechidiki vakawanda mukugadzira pamwe nokuita zvirongwa zvokuvamba
nokufambisa mabasa okuzviriritira. Mufaro wavo ndowekuona budiriro inobata munhu wose mune
zvose zvoupenyu.
Nyaya iyi yakaturikirwa kubva kuChiRungu kuenda kuChiShona neMidlands State University National
Language Institute.
