Oroorwa nechikwambo kwemakore makumi mana
Share
NaHeadrance Viga
NYAYA yaEmelly Tabvuma ane makore makumi mana ekuzvarwa (40) uye achigara kuHoward kuChiweshe inonzwisa tsitsi zvikuru pamwe nekudonhedzesa misodzi kunyanya kune vanhu vane hana nhete apo mudzimai uyu haasati aroorwa kana kukandwa shoko rerudo nevarume kubva zvaakazvarwa.
Varume vanoona mudzimai uyu sekunge ane murume nechekare asi murume wacho ari chikwambo.
Munhoroondo yemudzimai uyu zvinotaridza kuti haasati aroorwa kana kumbopfimbwa nevarume nekuda kwechikwambo chakadeketerwa paari sekutsanangurwa kwazvinoitwa nemamwe maporofita ezvemweya. Zvinonzi chikwambo ichi akachiberekeswa natete wake kubva pazuva raakazvarwa kusvika ikozvino, zvekutoti pose paanofamba hapana murume anomuda sezvo paari pane mumwe murume nechekare.
“Hushereketwa uhu hwakabva kunatete wangu nokuti tafamba kwakawanda tichiudzwa kuti ivo ndovari kukonzeresa dambudziko iri,” akadaro Emelly.
Zviri kushungurudza mudzimai uyu ndezvekuti vamwe wezera rake vapera kuroorwa uye vane vana iye haana kana mwana mumwechete. Naizvozvo chikumbiro chikuru chemudzimai uyu ndechekuti dai awana anogona kumubatsira kuti dambudziko rake ripere akwanisa kuroorwa nekuti nezera rake ari kuti haasisina nguva yakareba yokubereka mwana kana vana sezvo madzimai vachikasika kuguma kubereka kana zvichienzaniswa nevarume.
Amai vaEmelly vakatsinhira nezvedambudziko remwana uyu vachiti vafamba kwakawanda asi mhepo iri pamwana haisi kupera izvo zvaita kuti asvike makore akawanda zvakadaro asati aroorwa.
“Pana Emelly taedza zvose kuN’anga nekumaporifita asi shanduko hapana. Mwana uyu akagadzirwa nemunhu wehukama ndokupihwa murume nenzira yechikwambo ,” vakadaro amai vaEmelly.
