UHulumende uzathuthukisa impilo zabantu bemaphandleni

UMongameli uEmmerson Mnangagwa uthe uhulumende uzakwethula inhlelo ezinjonge
ukuthuthukisa impilo zabantu bemaphandleni.

Ekhuluma emhlanganweni webandla leZanu PF owe-20th National People’s Conference owenzelwa
eGweru ngeviki edluleyo, uMongameli Mnangagwa uthe uhulumende uzaqinisekisa ukutholiswa
kwezinsizakalo ezisezingeni eliphezulu njalo ukuthi izinhlelo zizagqitshwa ngesikhathi kulandelwa
indlela yokuqhuba umsebenzi eyeRiphabuliki Yesibili.

UMongameli uMnangagwa uthe, “Kulesi isigaba esitsha, izinhlelo zokwaba amandla zizathola
usekelo olukhulu ukuze kuthuthukiswe izakhiwo kanye lensizakalo ebantwini bakithi, ikakhulu labo
abahlala emaphandleni”.

UMongameli uthe abantu benza umsebenzi wabo ngesikhathi sempi yenkululeko. Ngakho-ke
uhulumende kufanele axazulule indingeko zabo njalo akhumbule izifiso zabo eziphathelane
lentuthuko.

UMongameli Mnangagwa uthe kumele uhulumende asebenze ngamandla ukuthuthukisa ukwenziwa
kwamabhizimusi emakhaya okuyinto eqakatheke kakhulu.

“Injongo yokwabiwa kwamandla iqukethe umbono wenkululeko othi ‘amandla ebantwini’’’.
Uhlelo lokwabela izabelo amandla selulethe intuthuko enkulu ekwakhiweni kwezakhiwo ezintsha
ezabelweni ezehlukeneyo.

“Ibandla lethu leZanu PF elibusayo kumele lenze konke okukhangelelwe kulo ukuze ilizwe
liqhubekele phambili njalo lithuthuke.”

“Njengeqembu elilalelayo elilwela inguquko, asiqhubekeni sitshengisa ukuthi sizimisele
ngokupheleleyo ukusebenzela ilizwe lethu ngokwethula izinhlelo ezizaletha intuthuko empilweni
zabantu bethu.”

“IZanu PF libandla lelifa lethu njalo iliqembu elizakhokhela leminyakeni ezayo; senza izinhlelo
ezihambelana lesikhathi, sihlela ibandla lethu kakutsha njalo siyalivuselela. Siqhubekela phambili
njalo asisoze sabuyela emuva .”

UMongameli the umhlangano lo uqinisekise ukuthi iZanu PF libandla labantu njalo ingumuzi
wabantu bonke beZimbabwe.

UMongameli uthe, “Ngesikhathi siqhubekela phambili, asiqhubekeni sitshengisa ubuhle bebandla
kanye lokubambana”.

Uthe Iqembu kufanele libe lomlandu omkhulu njalo likhethe ubukhokheli obuzimiseleyo. Kumele
njalo lisekele izinhlelo zikahulumende ukuze zigqitshwe ngokuphangisa.
Indaba le ihumutshelwe elimini lwesiNdebele yiMidlands State University National Language
Institute.