Usomabhizimusi weGweru njalo enguMqondisi weAfrican Business Council Lebhodi yeCOMESA,
uDokotela uTinashe Manzungu uphiwe isicoco se-African Archivers Award for Excellence in
Leadership and Global Corporate Enterprise in Africa eDale lePhalamende, eWestminster, eLondon.
Eveza ukuthi ubengakhangelelanga isicoco lesi njalo lokuthi ujabule kakhulu, uManzungu uthe
isicoco lesi sihambelana lesifiso sakhe sokuphatheka kakhulu ekuguquleni umnotho we-Afrika,
okuzakwenza ukuthi izwekazi le-Afrika libe yinsika yezokuthenga lozokuthengiselana emhlabeni
wonke jikelele.
UManzungu uthe, “Lesi yisicoco sami sakuqala se-African Archivers njalo yinto
ebengingayikhangelelanga”.
Ngizizwa ngihlonitshiwe ngoba isicoco lesi sivela kuzwekazi lonke—lokhu kungenza nginanzelele
ukuthi ngempela abantu bayabe bebona konke engiyabe ngikwenza.
“Sengizizwa sengilomlandu omkhulu wokwenza okunengi okwedlula lokhu ebengikwenza ukuze
ngiqhubekele phambili ngihlonipha isicoco lesi. Lokhu kuzakwenza ngiqhubekele phambili ngesifiso
sami sokuba yingxenye yalabo abazaguqula umnotho we-Afrika, okuzakwenza ukuthi izwekazi le-
Afrika libe yindawo ezaphatha ezokuthenga lozokuthengiselana emhlabeni wonke jikelele.”
UManzungu ugcizelele ukuthi ubukhokheli obuhle buqakathekile ukuze imisebenzi kanye lalokho
okungenzeka e-Afrika kuphumelele. Uveze ukuqakatheka kwe-African Continental Free Trade Area
kanye lomlandu wayo ekuletheni intuthuko kunhlangothi zonke.
“Nxa sikhangele izwekazi le-Afrika, lesi isicoco siveza lokho esingenelisa ukukwenza. Ngakho-ke, lesi
isicoco sisipha amandla okuqhubekela phambili. Sisiyaphambili, sizakhangela izindaba eziphathelane
le-African Continental Free Trade Area, okuyinhlanganiso eyabunjelwa ukuhlanganisa amazwe angu-
50.”
Uqhubekele phambili echasisa ukuthi, “Kuliqiniso ukuthi kulamanye amazwe ambalwa angakabi
yingxenye. Ngakho-ke, esikutshoyo lapha yikuthi nxa amazwe ethengiselana engabhadalisani
imithelo, i-Africa izathuthuka kuzo zonke inhlangothi.”
UManzungu uqhubekele phambili ekhuthaza abasakhulayo ukuthi baqale baqale imisebenzi
yobukhokheli kusasemasinyane ukuze baguqule umnotho wezwekazi le-Afrika lendlela abantu
abaphila ngayo.
“Ngikhuthaza abasakhulayo base-Afrika, labo abafisa ukuba zinkokheli zenhlanganiso zamazwe
amanengi ukuthi baqale besesebancane, njalo ngokuphangisa. Ekusebenzeni kwami ngafunda ukuthi
konke kuyeneliseka. Umuntu angaqala ukwenza ulutho oluqakathekileyo kancane kancane
aphumelele, hatshi esebenzisa ubugwelegwe njengokukholwa ngabanengi.”
Uthe, “Konke kumayelana lokunanzelela lokho owenelisa ukukwenza, ukuzimisela kungakhathalekile
ukuthi uhlangane lobunzima obunganani, ukumelana lobunzima kanye lokuqhubekala phambili
ulandela umbono wakho”.
Isicoco se-African Archivers, esingumcimbi oyenziwa minyaka yonke uhlose ukuncoma abantu,
inhlanganiso kanye lamankampani ngemisebenzi yabo yokuthuthukisa i-Africa
Umcimbi lo ngowokuthakazelela ukwenza kuhle, ubungcitshi, ubukhokheli kanye lempumela enhle
kunhlangothi ezitshiyeneyo, ezihlanganisela ezamabhizimusi, ezombusazwe, ubuciko lesintu,
ezemidlalo, ezemfundo kanye lezempilakahle.
Umcimbi lo upha abanye amadlabuzane okwenza okuhle okuzadala umahluko kukho konke
abakwenzayo.
Indaba le ihumutshelwe elimini lwesiNdebele yiMidlands State University National Language
Institute.
