Sharon Chigeza
MUTARE – Vanhu vemudunhu reManicaland varatidza kushushikana nevanhu vane migodhi iri pedyo nenzizi nekuda kwetsvina iri kukanganisa varimi nenharaunda dziri pasi perwizi.
Kusvibiswa kwemvura kwasvika padanho rinotyisa murwizi rwaMutare nekuda kwekucherwa kwezvicherwa pedyo nerwizi, izvo zviri kukonzera zvakare ndambudziko rekorera nekuda kwekusachena kwemvura iyi.
“Migodhi iri pedyo nerwizi iyi yakasvibisa mvura yedu zvekuti hatikwanise kuinwa kana kuigeza,” akadaro mumwe mugari wekwa Odzi.
Mumwewo, Tendai Nyakureba akati migodhi iyi yave kukonzera kunetsa kwemvura izvo zvinova zvezvimwe zvakonzera kutekeshera kwechirwere chekorera.
“Kunetsa kwemvura kwave kukonzera kuti vanhu vave nechirwere chekorera munzvimbo medu. Mvura yakasviba, nekuda kwemabasa ezvicherwa pedyo nerwizi, yakanganisa zvikuru raramo. Tinokumbira kuti zvibhorani zviwedzerwe kuitira kuti tiwane mvura yakachena yakakwana,” akadaro.
Bazi rezveutano nekurerwa kwevana rinoti kusvibiswa kwemvura murwizi rwaMutare ndezvimwe zviri kukonzera kutekeshera kwechirwere chekorera chabata veruzhinji kwaMutasa.
“Kunyange takaona kudzikira kwechirwere chekorera, tine nzvimbo imwe chete isati yasara inova Premier kwaMutasa. Mhosva dziri kunetsa mudunhu iri dziri kutsvagwa kubva kunzvimbo inocherwa zvicherwa,” vanodaro Manicaland Provincial Medical Director, Dr Munyaradzi Mukuzunga.
Mvura ine tsvina yakawanda yakanganisawo mabasa ekurima kwemadiridziro munzvimbo iyi.
“Madhaka ari mumvura idambudziko guru. Musiyano wegoho uripo pakati pekudiridza gorosi nemvura yemurwizi maMutare nemvura yemuchibhorani inosvika tani imwe chete pahekita uye gorosi racho riri kukanganiswa zvakanyanya,” vakadaro mumwe murimi, VaAllan Franklin.
Bazi reEnvironmental Management Agency rakanga raona zvakakosha kuti vashandi vemumigodhi vatevedzere gwara rakatarwa mumashandiro avo.
“Migodhi inobatsira zvikuru mukusimudzira upfumi hwenyika. Zvakadaro, dambudziko ratiri kutarisana naro nderekuti vamwe vari kuzviita nenzira isingaite. Tiri kuita dambudziko rekusvibiswa kwemvura izvo zviri kukanganisa vamwe vanoshandisa nharaunda. Tiri kukurudzira vari mubazi rezvemigodhi kuti varambe vakavharwa kuitira kuti mvura isasvibisa,” vanodaro maneja weManicaland Environmental Management Agency, Kingston Chitotombe.
Sezvo zvicherwa nekurima zvichikosha mukukura kwehupfumi, nyanzvi dzinopokana kuti pane kudikanwa kwekuona kuti pave nekugarisana uye kushanda kwakasimba kuitira kuti zvikamu zviviri izvi zvibudirire.
