Unkwali we Indonsakusa
Kutoreswa imhiko kwaba Tonderai Mutasa kuti bebe kansila we wadi 1 ku Victoria Falls kwabuzilija kulebeleka kulowanda pakati pabagali pamwempela nabamwe balosiyana negapo lilye. Kundila mbeli kwaba Mutasa pechigalo chakansili pakatanga yopo Ephias Mambume pakamiswa mugapo zwisilolingililwa kuti eshalujwe.
BaMambume yabo banoba ibo bakabakwaliswa kukwikwijana kwechigalo chewadhi 1 pasi pe Citizens Coalition for Change (CCC) bakatatamirwa mubato ndokuvha banokwaliswa sonhu ulozumililila. Zuli alo kuda kukwe kwechigalo chekansili akujakaba konshaji undefu.
Umwe ungali woku Victoria Falls, unoba iye usinoda kudomwa nezina lilye, wakanokunijila baMambume penyaya jabo jokukonelwa kulipa mitelo yemvula kukansili. Bopezhulu zhulu bakapa untongo wakabhanchija ungali yoyu, bakawana maMambume eli nondandu yabaku. Yozu zwakata baMambume batolelwe ikojelo yabo yokukwikwija pasi nomulawo wenyika.
Untongo wekoti wakazhulila ZANU PF kuti baMutasa betole imhiko sa kansila we ward 1. Umbati wechigalo che ZANU PF, ba Matthew Mukeya, baboka kutoleswa imhiko kwaba Mutasa beti ibo yoku ndiko kuzunda kwata igapo lyabo beti ibo zwinotondeja kuti ZANU PF inowina kubugalo bwe Victoria Falls.
“Tinoshanta zwikulugulu kuti ba Tonderai Mutasa batoleswa inhiko sa kansila unyowani we ward 1,” bakadalo ba Muleya.
“Yozu zwinotondejela kuti ibhatuko le ZANU PF lichinotonga mubugalo bwe Victoria Falls, tinobimba kuti ba Mutasa bachashinga zwanana pamwe chete nabamwe makansila mukukwendesa unshingo kubanhu,”bakadalo.
New Ziana
